ᱮᱱ ᱦᱤᱞᱚᱜ ᱵᱮᱞᱟ ᱡᱟᱸᱦᱟᱱ ᱠᱟᱹᱢᱤ ᱵᱟᱝ ᱛᱟᱦᱮᱸ ᱠᱟᱱ ᱛᱮ ᱱᱟᱢ ᱛᱮᱠᱚ ᱥᱮᱫ ᱫᱟᱬᱟ ᱵᱟᱲᱟ ᱤᱧ ᱥᱮᱱᱞᱮᱱᱟ᱾ ᱥᱮᱱ ᱠᱟᱛᱮᱧ ᱧᱮᱞᱠᱮᱫᱮᱭᱟ ᱱᱟᱢᱟᱨᱮᱱ ᱥᱟᱺᱡᱽᱞᱤ ᱵᱤᱴᱤ ᱯᱩᱛᱩᱞ ᱫᱚ ᱢᱤᱫᱴᱟᱹᱝ ᱪᱤᱴᱷᱤ ᱥᱟᱵ ᱠᱟᱛᱮᱭ ᱫᱩᱲᱩᱵ ᱦᱟᱹᱯᱤ ᱟᱠᱟᱱᱟᱭ᱾ ᱠᱩᱞᱤ ᱜᱚᱫ ᱠᱮᱫᱮᱭᱟᱹᱧ ᱪᱮᱫ ᱪᱤᱴᱷᱤ ᱠᱟᱱᱟ ᱥᱟᱺᱡᱽᱞᱤ? ᱪᱮᱫᱟᱜ ᱮᱢ ᱫᱩᱲᱩᱵ ᱛᱷᱤᱨᱮᱱᱟ? ᱢᱮᱛᱟᱫ ᱫᱤᱧᱟᱜ, ᱦᱮᱸ ᱥᱟᱹᱨᱤ ᱜᱮ ᱫᱩᱲᱩᱵ ᱛᱷᱤᱨ ᱟᱠᱟᱱᱟᱹᱧ ᱥᱚᱦᱟᱜᱤᱱᱤᱭᱟᱜ ᱱᱚᱶᱟ ᱪᱤᱴᱷᱤ ᱯᱟᱲᱦᱟᱣ ᱠᱟᱛᱮ᱾ ᱠᱩᱞᱤ ᱠᱮᱫᱮᱭᱟᱹᱧ ᱚᱠᱚᱭ ᱠᱟᱱᱟᱭ ᱥᱚᱦᱟᱜᱤ ᱫᱚ, ᱪᱮᱫ ᱮ ᱚᱞ ᱟᱠᱟᱣᱟᱫ ᱢᱮᱭᱟ?
ᱥᱚᱦᱟᱜᱤᱱᱤ ᱛᱮᱞᱮ ᱫᱚ ᱢᱤᱫ ᱛᱮ ᱩᱥᱟᱜᱮᱨᱟᱢ ᱜᱟᱨᱞᱥ ᱦᱳᱥᱞᱮᱴ ᱨᱮᱞᱮ ᱛᱟᱦᱮᱸ ᱠᱟᱱᱟ᱾ ᱚᱞ ᱟᱠᱟᱣᱟᱹᱫᱤᱧᱟᱜ ᱡᱮ, ᱢᱚᱱ ᱚᱱᱛᱚᱨ ᱨᱮ ᱢᱤᱫᱴᱟᱹᱝ ᱡᱟᱭᱜᱟ ᱴᱷᱤᱠ ᱠᱟᱛᱮ ᱩᱥᱟᱹᱨᱟᱧ ᱵᱟᱰᱟᱭ ᱦᱚᱪᱚᱭ᱾ ᱵᱷᱟᱲᱟ ᱚᱲᱟᱜ ᱛᱟᱹᱱᱤᱡ ᱤᱧ ᱴᱷᱤᱠ ᱫᱟᱲᱮᱭᱟᱜ ᱠᱷᱟᱱ ᱨᱩᱵᱤ ᱫᱟ ᱛᱟᱹᱠᱤᱱ ᱦᱮᱡ ᱠᱟᱛᱮ ᱠᱤᱱ ᱛᱟᱸᱦᱮᱱᱟ᱾ ᱚᱠᱚᱭ ᱠᱟᱱᱟᱭ ᱨᱩᱵᱤᱫᱟ ᱫᱚ?
ᱥᱟᱹᱨᱤ ᱜᱮ ᱚᱱᱟ ᱜᱮᱧ ᱦᱩᱫᱤᱥ ᱮᱫᱟ ᱤᱧ ᱦᱚᱸ᱾ ᱨᱩᱵᱤᱫᱟ ᱟᱨ ᱥᱚᱦᱟᱜᱤᱱᱤᱼᱭᱟᱜ ᱫᱩᱞᱟᱹᱲ ᱨᱮᱭᱟᱜ ᱡᱚᱲᱟᱣ ᱫᱚ ᱟᱹᱰᱤ ᱦᱟᱦᱟᱲᱟ᱾ ᱛᱮᱦᱮᱧ ᱩᱱᱠᱤᱱ ᱞᱟᱹᱜᱤᱫ ᱪᱮᱫ ᱤᱧ ᱪᱤᱠᱟᱹ ᱫᱟᱲᱮᱭᱟᱜᱼᱟ? ᱦᱳᱥᱴᱮᱞ ᱨᱮ ᱛᱟᱦᱮᱸ ᱠᱟᱱ ᱨᱮ ᱥᱚᱦᱟᱜᱤᱱᱤ ᱡᱟᱣ ᱜᱮ ᱡᱚᱛᱚ ᱠᱟᱛᱷᱟᱭ ᱞᱟᱹᱭᱟᱹᱧ ᱠᱟᱱ ᱛᱟᱦᱮᱸ ᱠᱟᱱᱟ, ᱥᱚᱦᱟᱜᱤᱱᱤ ᱫᱚ ᱟᱡ ᱵᱟᱵᱟ ᱯᱟᱨᱜᱟᱱᱟ ᱨᱮᱱ ᱥᱟᱫᱷᱮᱨ ᱦᱚᱯᱚᱱ ᱮᱨᱟ, ᱟᱹᱰᱤ ᱠᱟᱹᱴᱤᱡ ᱩᱢᱮᱨ ᱨᱮᱜᱮ ᱟᱡ ᱜᱚᱜᱚ ᱫᱚᱭ ᱴᱩᱣᱟᱹᱨ ᱦᱚᱴᱚ ᱟᱠᱟᱫᱮᱭᱟ᱾ ᱯᱟᱨᱜᱟᱱᱟ ᱫᱚ ᱜᱷᱟᱨᱚᱸᱡᱽ ᱪᱟᱞᱟᱣ ᱢᱩᱥᱠᱤᱞ ᱮ ᱵᱩᱡᱷᱟᱹᱣ ᱠᱮᱫ ᱛᱮ ᱫᱚᱥᱟᱨ ᱫᱷᱟᱣ ᱟᱨᱦᱚᱸ ᱮᱨᱟᱭ ᱧᱟᱢ ᱟᱱᱟ᱾ ᱥᱚᱦᱟᱜᱤᱱᱤ ᱫᱚ ᱠᱟᱹᱠᱤ ᱜᱚᱜᱚ ᱛᱤᱨᱮᱭ ᱯᱟᱲᱟᱣᱮᱱᱟ᱾ ᱠᱟᱹᱠᱤ ᱜᱚᱜᱚ ᱫᱚ ᱥᱚᱦᱟᱜᱤᱱᱤ ᱜᱮ ᱫᱟᱜ ᱞᱩ ᱛᱷᱟᱹᱨᱤ ᱜᱟᱥᱟᱣ ᱮᱢᱟᱱ ᱡᱚᱛᱚᱭ ᱠᱟᱹᱢᱤ ᱦᱚᱪᱚᱭᱟ᱾ ᱢᱤᱫ ᱫᱤᱱ ᱠᱟᱹᱠᱤ ᱜᱚᱜᱚ ᱫᱚ ᱥᱚᱦᱟᱜᱤᱱᱤ ᱫᱟᱜ ᱞᱩᱭ ᱠᱳᱞ ᱞᱮᱫᱮᱭᱟ᱾ ᱚᱱᱟ ᱞᱟᱦᱟ ᱨᱮ ᱤᱱᱫᱽᱨᱟᱹ ᱠᱩᱧ ᱠᱷᱚᱱ ᱫᱟᱜ ᱫᱚ ᱥᱚᱦᱟᱜᱤᱱᱤ ᱛᱤᱥ ᱦᱚᱸ ᱵᱟᱭ ᱞᱩ ᱵᱟᱲᱟᱭᱮᱫ ᱛᱟᱦᱮᱸ ᱠᱟᱱᱟ᱾ ᱢᱤᱫ ᱴᱮᱱ ᱦᱚᱯᱚᱱ ᱠᱟᱸᱰᱩᱢ ᱮᱱᱛᱮ ᱠᱩᱧ ᱴᱷᱮᱱ ᱮ ᱥᱮᱱᱮᱱᱟ, ᱢᱮᱱᱠᱷᱟᱱ ᱠᱩᱧ ᱠᱷᱚᱱ ᱫᱟᱜ ᱵᱟᱭ ᱨᱟᱠᱟᱵ ᱫᱟᱲᱮᱭᱟᱜ ᱠᱟᱱ ᱛᱮ ᱚᱸᱰᱮ ᱜᱮ ᱛᱤᱸᱜᱩ ᱠᱟᱛᱮ ᱠᱩᱥᱩᱫ ᱠᱩᱥᱩᱫ ᱨᱟ~ᱨᱟᱜ ᱮ ᱮᱦᱚᱵ ᱮᱱᱟ᱾ ᱩᱱ ᱚᱠᱛᱚ ᱩᱱᱠᱩᱨᱮᱱ ᱜᱩᱛᱤ ᱠᱚᱲᱟ ᱨᱩᱵᱤ ᱫᱚ ᱚᱱᱛᱮᱭ ᱥᱮᱱ ᱯᱟᱨᱚᱢᱚᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱠᱩᱞᱤ ᱠᱮᱫᱮᱭᱟᱭ ᱪᱮᱫᱟᱜ ᱮᱢ ᱨᱟᱜ ᱮᱫᱟ? ᱥᱚᱦᱟᱜᱤᱱᱤ ᱫᱚ ᱨᱟᱜ ᱛᱩᱞᱩᱡ ᱮ ᱨᱚᱲ ᱨᱩᱣᱟᱹᱲ ᱠᱮᱫᱟ ᱼ ᱫᱟᱜ ᱵᱟᱹᱧ ᱨᱟᱠᱟᱵ ᱫᱟᱲᱮᱭᱟᱜ ᱠᱟᱱᱟ ᱨᱩᱵᱤ ᱫᱟ᱾
ᱜᱩᱛᱤ ᱠᱚᱲᱟ ᱨᱩᱵᱤᱭ ᱢᱮᱱ ᱠᱮᱫᱟ ᱼ “ᱟᱞᱚᱢ ᱨᱟᱜᱟ ᱫᱮᱱ ᱤᱧᱤᱧ ᱞᱩ ᱟᱢᱟ᱾ ᱟᱨ ᱟᱢ ᱜᱚᱜᱚ ᱫᱟᱜ ᱞᱩᱭ ᱠᱳᱞ ᱠᱟᱢ ᱠᱷᱟᱱ ᱤᱧ ᱦᱚᱦᱚᱣᱟᱹᱧ ᱢᱮ, ᱤᱧ~ᱤᱧ ᱞᱩ ᱨᱟᱠᱟᱵ ᱟᱢᱟ᱾ ” ᱩᱱ ᱦᱤᱞᱚᱜ ᱠᱷᱚᱱ ᱡᱟᱣ ᱜᱮ ᱨᱩᱵᱤ ᱫᱚ ᱥᱚᱦᱟᱜᱤᱱᱤᱭᱟᱜ ᱠᱟᱸᱰᱟ ᱨᱮ ᱫᱟᱜ ᱮ ᱞᱩ ᱯᱮᱨᱮᱡᱟ ᱟᱨ ᱥᱚᱦᱟᱜᱤᱱᱤ ᱫᱚᱭ ᱤᱫᱤᱭᱟ᱾ ᱟᱨ ᱨᱩᱵᱤ ᱫᱚ ᱟᱹᱰᱤ ᱫᱩᱞᱟᱹᱲ ᱟᱲᱟᱝ ᱛᱮ ᱥᱚᱦᱟᱜᱤᱱᱤ ᱥᱟᱶᱛᱮᱭ ᱜᱟᱞᱢᱟᱨᱟᱣᱟ᱾ ᱱᱚᱛᱮᱭ ᱵᱟᱰᱟᱭ ᱠᱟᱱ ᱛᱟᱦᱮᱸ ᱠᱟᱱᱟ ᱩᱱᱤ ᱜᱤᱫᱽᱨᱟᱹ ᱥᱚᱸᱜᱮ ᱢᱚᱡᱽ ᱵᱮᱵᱷᱟᱨ ᱞᱮᱠᱟᱱ ᱠᱚᱫᱚ ᱜᱷᱟᱨᱚᱸᱡᱽ ᱨᱮ ᱚᱠᱚᱭ ᱦᱚᱸ ᱵᱟᱠᱚ ᱛᱟᱦᱮᱸ ᱠᱟᱱᱟ᱾ ᱢᱤᱫ ᱵᱚᱪᱷᱚᱨ ᱛᱟᱭᱚᱢ ᱛᱮᱜᱮ ᱠᱟᱹᱠᱤ ᱜᱚᱜᱚᱨᱮᱱ ᱢᱤᱫᱴᱟᱹᱝ ᱠᱚᱲᱟ ᱜᱤᱫᱽᱨᱟᱹᱭ ᱦᱩᱭ ᱮᱱᱟ᱾ ᱥᱚᱦᱟᱜᱤᱱᱤᱼᱭᱟᱜ ᱠᱟᱹᱢᱤ ᱫᱚ ᱟᱹᱰᱤ ᱟᱸᱴ ᱵᱟᱹᱲᱛᱤ ᱤᱫᱤᱭᱮᱱᱟ᱾ ᱟᱹᱛᱩ ᱤᱥᱠᱩᱞ ᱨᱮᱭ ᱯᱟᱲᱦᱟᱣᱜ ᱠᱟᱱ ᱛᱟᱦᱮᱸ ᱠᱟᱱᱟ; ᱢᱮᱱᱠᱷᱟᱱ ᱧᱮᱞᱮᱱᱟ ᱠᱟᱹᱢᱤ ᱠᱚᱨᱮᱱᱟᱜ ᱵᱷᱤᱲ ᱤᱭᱟᱹ ᱛᱮ ᱫᱤᱱᱟᱹᱢ ᱦᱤᱞᱚᱜ ᱤᱥᱠᱩᱞ ᱫᱚ ᱵᱟᱭ ᱪᱟᱞᱟᱣ ᱫᱟᱲᱮᱭᱟᱜᱼᱟ᱾ ᱵᱚᱪᱷᱚᱨ ᱨᱮᱭᱟᱜ ᱢᱩᱪᱟᱹᱫ ᱵᱤᱱᱤᱰ ᱨᱮ ᱥᱚᱦᱟᱜᱤᱱᱤ ᱫᱚ ᱵᱟᱭ ᱯᱟᱥ ᱫᱟᱲᱮᱭᱟᱫᱟ ᱴᱷᱟᱠᱮᱫ ᱛᱟᱦᱮᱸ ᱮᱱᱟᱭ᱾
ᱥᱚᱦᱟᱜᱤᱱᱤ ᱟᱡ ᱵᱟᱵᱟ ᱫᱚ ᱱᱚᱶᱟ ᱧᱮᱞ ᱠᱟᱛᱮ ᱟᱹᱰᱤ ᱦᱩᱫᱤᱥ ᱨᱮᱭ ᱯᱟᱲᱟᱣᱮᱱᱟ᱾ ᱪᱤᱠᱟᱹ ᱛᱮ ᱥᱚᱦᱟᱜᱤᱱᱤ ᱫᱚᱭ ᱴᱷᱟᱠᱮᱫ ᱛᱟᱦᱮᱸ ᱮᱱᱟ? ᱢᱤᱫ ᱫᱤᱱ ᱨᱩᱵᱤ ᱫᱚ ᱯᱟᱨᱜᱟᱱᱟᱭ ᱢᱮᱛᱟᱫ ᱮᱭᱟ ᱥᱚᱦᱟᱜᱤᱱᱤ ᱫᱚ ᱢᱤᱫᱴᱟᱹᱝ ᱵᱳᱰᱤᱝ (ᱦᱳᱥᱴᱮᱞ) ᱛᱟᱱᱟᱜ ᱨᱮ ᱵᱷᱩᱨᱛᱤ ᱠᱟᱭ ᱢᱮ᱾ ᱚᱲᱟᱜ ᱨᱮᱫᱚ ᱠᱟᱹᱢᱤ ᱠᱚ ᱨᱮᱭᱟᱜ ᱵᱷᱤᱲ ᱛᱮ ᱵᱟᱭ ᱯᱟᱲᱦᱟᱣ ᱫᱟᱲᱮᱭᱟᱜ ᱠᱟᱱᱟ᱾ ᱟᱨ ᱥᱚᱦᱟᱜᱤᱱᱤ ᱟᱯᱟᱛ ᱫᱚ ᱩᱥᱟᱜᱮᱨᱟᱢ ᱜᱟᱨᱞᱥ ᱦᱳᱥᱴᱮᱞ ᱛᱮ ᱤᱫᱤ ᱮ ᱞᱟᱹᱜᱤᱫ ᱮ ᱜᱚᱴᱟ ᱠᱮᱫᱟ᱾ ᱱᱚᱶᱟ ᱠᱟᱛᱷᱟ ᱵᱟᱰᱟᱭ ᱠᱟᱛᱮ ᱮᱸᱜᱟᱛ ᱫᱚᱭ ᱢᱮᱱ ᱠᱮᱫᱟ, “ᱵᱚᱦᱚᱜ ᱨᱮᱫᱚ ᱵᱟᱹᱱᱩᱜ ᱛᱟᱭᱟ, ᱠᱷᱚᱨᱚᱡᱽ ᱵᱟᱹᱰ ᱯᱷᱟᱨᱟᱠ ᱛᱮ ᱤᱫᱤ ᱠᱟᱛᱮ ᱫᱚ ᱪᱮᱫ ᱦᱩᱭᱩᱜᱼᱟ᱾ ᱠᱩᱲᱤ ᱜᱤᱫᱽᱨᱟᱹ ᱯᱟᱲᱦᱟᱣ ᱠᱟᱛᱮ ᱵᱟᱝ ᱪᱮᱫ ᱮᱢ ᱪᱤᱠᱟᱹᱭ?” ᱢᱮᱱᱠᱷᱟᱱ ᱥᱚᱦᱟᱜᱤᱱᱤ ᱟᱯᱟᱛ ᱫᱚᱭ ᱵᱟᱰᱟᱭᱟ, ᱠᱩᱲᱤ ᱜᱤᱫᱽᱨᱟᱹ ᱚᱞᱚᱜ ᱯᱟᱲᱦᱟᱣ ᱪᱮᱫ ᱚᱪᱚ ᱠᱚ ᱨᱮᱭᱟᱜ ᱰᱷᱮᱨ ᱡᱟᱹᱨᱩᱲ ᱢᱮᱱᱟᱜᱼᱟ᱾ ᱮᱱᱛᱮ “ᱩᱱᱠᱩ ᱠᱟᱱ ᱜᱮᱠᱚ ᱛᱟᱭᱚᱢ ᱫᱟᱨᱟᱢ ᱢᱚᱡᱽ ᱜᱷᱟᱨᱚᱸᱡᱽ ᱵᱮᱱᱟᱣ ᱨᱟᱠᱟᱵ ᱠᱚᱫᱚ᱾” ᱟᱨ ᱥᱚᱦᱟᱜᱤᱱᱤ ᱫᱚ ᱩᱥᱟᱜᱨᱟᱢ ᱜᱟᱨᱞᱥ ᱦᱳᱥᱴᱮᱞ ᱛᱮᱭ ᱤᱫᱤ ᱦᱚᱴᱚ ᱠᱟᱫᱮᱭᱟ᱾
ᱥᱚᱦᱟᱜᱤᱱᱤ ᱫᱚ ᱦᱟᱨᱟᱜ ᱠᱟᱱ ᱛᱩᱞᱩᱡ ᱚᱞᱚᱜ ᱯᱟᱲᱦᱟᱣᱜ ᱦᱚᱸ ᱪᱮ ᱡᱚᱝ ᱮ ᱮᱦᱚᱵ ᱠᱮᱫᱟ᱾ ᱴᱟᱠᱟ ᱯᱩᱭᱥᱟᱹ ᱤᱫᱤ ᱦᱚᱴᱚ ᱠᱟᱜ ᱞᱟᱹᱜᱤᱫ ᱟᱨ ᱦᱤᱨᱤ ᱵᱟᱲᱟᱭ ᱞᱟᱹᱜᱤᱫ ᱯᱟᱨᱜᱟᱱᱟ ᱫᱚ ᱨᱩᱵᱤ ᱜᱮᱭ ᱠᱳᱞ ᱟᱭᱟ᱾ ᱪᱷᱩᱴᱤ ᱠᱚᱨᱮ ᱦᱚᱸ ᱨᱩᱵᱤ ᱜᱮᱭ ᱤᱫᱤᱼᱟᱹᱜᱩ ᱮᱭᱟ᱾ ᱚᱱᱟᱛᱮ ᱥᱚᱦᱟᱜᱤᱱᱤ ᱦᱚᱸ ᱟᱠᱚ ᱨᱮᱱ ᱜᱩᱛᱤ ᱨᱩᱵᱤ ᱜᱮ ᱟᱡᱟᱜ ᱡᱟᱹᱨᱩᱲᱚᱜ ᱠᱚᱫᱚ ᱥᱟᱱᱟᱢ ᱮ ᱞᱟᱹᱭ ᱟᱭᱟ᱾
ᱢᱤᱫ ᱫᱚᱢ ᱥᱤᱛᱩᱝ ᱪᱷᱩᱴᱤ ᱨᱮ ᱦᱳᱥᱴᱮᱞ ᱠᱷᱚᱱ ᱦᱤᱡᱩᱜ ᱚᱠᱛᱮ ᱦᱚᱨ ᱨᱮ ᱥᱚᱦᱟᱜᱤᱱᱤ ᱫᱚ ᱨᱩᱵᱤ ᱮ ᱠᱩᱞᱤ ᱠᱮᱫᱮᱭᱟ, “ᱟᱪᱷᱟ ᱨᱩᱵᱤ ᱫᱟ, ᱟᱞᱮ ᱴᱷᱮᱱ ᱟᱹᱰᱤ ᱟᱭᱢᱟ ᱫᱤᱱᱮᱢ ᱠᱟᱹᱢᱤ ᱠᱮᱫᱟ ᱟᱨ ᱵᱟᱹᱫ ᱠᱚᱦᱚᱸᱢ ᱠᱤᱨᱤᱧ ᱵᱟᱲᱟ ᱠᱮᱫᱟ᱾ ᱪᱮᱫᱟᱜ ᱟᱫᱚ ᱵᱟᱢ ᱵᱟᱯᱞᱟᱜ ᱠᱟᱱᱟ? ᱨᱩᱵᱤ ᱫᱚ ᱱᱚᱶᱟ ᱠᱟᱛᱷᱟ ᱛᱮ ᱠᱚᱲᱟᱢ ᱨᱮ ᱥᱚᱵᱚᱜ ᱠᱮᱫᱮ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱫᱟ ᱟᱨᱮ ᱛᱩᱸᱵᱩᱫ ᱦᱟᱹᱯᱤᱭᱮᱱᱟ ᱟᱨ ᱚᱱᱛᱚᱨ ᱨᱮᱱᱟᱜ ᱫᱩᱠ ᱡᱷᱟᱨᱱᱟ ᱫᱚ ᱢᱮᱫ ᱠᱷᱚᱱ ᱵᱚᱦᱮᱞ ᱚᱰᱚᱠ ᱮᱱᱟ᱾ ᱚᱱᱟ ᱧᱮᱞ ᱛᱮ ᱥᱚᱦᱟᱜᱤᱱᱤ ᱫᱚᱭ ᱦᱟᱦᱟᱲᱟ ᱮᱱᱟ ᱟᱨ ᱮ ᱵᱚᱛᱚᱨ ᱮᱱᱟ, “ᱨᱩᱵᱤ ᱫᱟ ᱟᱪᱷᱟ ᱨᱟᱜ ᱮᱫ ᱠᱟᱱᱟᱭ? ᱠᱩᱞᱤ ᱮᱭᱟ ᱥᱮ ᱵᱟᱝ?” ᱥᱚᱦᱟᱜᱤᱱᱤ ᱵᱟᱭ ᱡᱤᱣᱤ ᱞᱮᱫᱟ, ᱠᱩᱞᱤ ᱠᱮᱫᱮᱭᱟ, “ᱨᱩᱵᱤ ᱫᱟ ᱪᱮᱫᱟᱜ ᱮᱢ ᱨᱟᱜ ᱮᱫᱟ?” ᱨᱩᱵᱤ ᱫᱟ ᱡᱟᱦᱟᱸ ᱞᱮᱠᱟᱛᱮ ᱢᱮᱫ ᱫᱟᱜ ᱥᱟᱸᱵᱽᱲᱟᱣ ᱠᱟᱛᱮᱭ ᱢᱮᱱ ᱠᱮᱫᱟ, “ᱟᱢᱹᱹᱹ” ᱟᱨᱮ ᱛᱷᱤᱨ ᱮᱱᱟ᱾
“ᱤᱧᱹᱹᱹ ᱤᱧ ᱫᱚ ᱪᱮᱫ ᱨᱩᱵᱤᱫᱟ?”
ᱨᱩᱵᱤ ᱨᱚᱲ ᱮ ᱮᱦᱚᱵ ᱮᱱᱟ, “ᱟᱢ ᱫᱚ ᱯᱟᱥᱮᱱ ᱵᱟᱢ ᱫᱤᱥᱟᱹᱭᱟ ᱜᱤᱱᱤ, ᱟᱢ ᱵᱟᱵᱟ ᱛᱤᱱ ᱨᱮ ᱫᱚᱥᱟᱨ ᱫᱷᱟᱣ ᱵᱟᱯᱞᱟ ᱠᱟᱛᱮ ᱟᱢ ᱜᱚᱜᱚᱭ ᱟᱹᱜᱩ ᱠᱮᱫᱮᱭᱟ, ᱚᱱᱟ ᱛᱟᱭᱚᱢ ᱠᱷᱚᱱ ᱵᱟᱯᱞᱟ ᱠᱟᱛᱮ ᱟᱢ ᱜᱚᱜᱚᱭ ᱟᱹᱜᱩ ᱠᱮᱫᱮᱭᱟ, ᱚᱱᱟ ᱛᱟᱭᱚᱢ ᱠᱷᱚᱱ ᱡᱟᱣ ᱜᱮ ᱫᱟᱜ ᱤᱧ ᱞᱩ ᱟᱢ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱟᱢᱟᱜ ᱫᱩᱠ ᱧᱮᱞ ᱛᱮ ᱤᱧ ᱜᱮ ᱢᱚᱱᱮ ᱨᱮ ᱫᱩᱠ ᱤᱧ ᱟᱴᱠᱟᱨᱮᱫ ᱛᱟᱦᱮᱸ ᱠᱟᱱᱟ᱾ ᱟᱢ ᱵᱟᱵᱟ ᱫᱚ ᱟᱹᱰᱤ ᱟᱸᱴ ᱮ ᱫᱩᱞᱟᱹᱲ ᱢᱮ ᱤᱱᱟᱹ ᱛᱮ ᱟᱢ ᱡᱮᱢᱚᱱ ᱵᱮᱥ ᱛᱮᱢ ᱦᱟᱨᱟᱜ ᱟᱨ ᱜᱳᱜᱳᱼᱣᱟᱜ ᱫᱩᱞᱟᱹᱲ ᱮᱢ ᱧᱟᱢ, ᱚᱱᱟ ᱤᱭᱟᱹ ᱛᱮᱜᱮ ᱫᱚᱥᱟᱨ ᱟᱢ ᱜᱳᱜᱳᱭ ᱟᱹᱜᱩ ᱞᱮᱫᱮᱭᱟ᱾ ᱟᱢ ᱵᱟᱵᱟᱼᱣᱟᱜ ᱥᱟᱱᱟ ᱵᱟᱝ ᱯᱩᱨᱟᱹᱣ ᱞᱮᱱᱟ, ᱟᱨ ᱟᱢ ᱵᱟᱵᱟ ᱡᱟᱣ ᱜᱮ ᱠᱟᱹᱢᱤ ᱠᱚ ᱨᱮᱭᱟᱜ ᱡᱷᱟᱢᱮᱞᱟ ᱨᱮ ᱛᱟᱸᱦᱮᱱ ᱤᱱᱟᱹ ᱛᱮ ᱟᱢ ᱴᱷᱮᱱ ᱫᱚ ᱤᱧ ᱜᱮᱭ ᱠᱳᱞ ᱤᱧᱟ᱾ ᱚᱱᱟ ᱠᱟᱨᱚᱱ ᱛᱮ ᱟᱢ ᱜᱳᱜᱳᱼᱣᱟᱜ ᱟᱹᱰᱤ ᱞᱮᱠᱟᱱ ᱵᱟᱹᱲᱤᱡ ᱨᱚᱲ ᱥᱟᱦᱟᱣ ᱦᱩᱭ ᱟᱠᱟᱫᱤᱧᱟ᱾ ᱥᱟᱹᱨᱤ ᱜᱮ ᱜᱤᱱᱤ ᱤᱧ ᱫᱚ ᱟᱯᱮ ᱨᱮᱱ ᱜᱩᱛᱤ; ᱢᱮᱱᱠᱷᱟᱱ ᱛᱮᱦᱮᱧ ᱫᱚ ᱱᱚᱶᱟ ᱫᱷᱟᱹᱨᱛᱤ ᱨᱮ ᱮᱠᱷᱮᱱ ᱟᱢ ᱜᱮᱧ ᱫᱩᱞᱟᱹᱲ ᱟᱠᱟᱫ ᱢᱮᱭᱟᱹᱹᱹ ᱤᱧᱟᱜ ᱡᱤᱣᱤ ᱨᱮ ᱥᱩᱠ ᱫᱩᱠ ᱨᱮᱱ ᱜᱚᱲᱚᱼᱭᱤᱡ ᱢᱮᱱᱛᱮ᱾ ᱮᱠᱷᱮᱱ ᱢᱤᱫ ᱫᱷᱟᱣ ᱤᱧ ᱥᱮᱫ ᱵᱮᱥ ᱛᱮ ᱠᱚᱭᱚᱜᱽ ᱢᱮ ᱜᱤᱱᱤ ᱟᱨ ᱧᱮᱞᱤᱧ ᱢᱮ, ᱟᱫᱚᱢ ᱵᱩᱡᱷᱟᱹᱣᱟ ᱟᱢ ᱞᱟᱹᱜᱤᱫ ᱤᱧ ᱫᱚ ᱛᱤᱱᱟᱹᱜ ᱫᱤᱱ ᱠᱷᱚᱱ ᱛᱟᱺᱜᱤ ᱨᱮ ᱢᱤᱱᱟᱹᱧᱟ᱾
ᱥᱚᱦᱟᱜᱤᱱᱤ ᱫᱚ ᱢᱚᱱᱮ ᱨᱮᱭ ᱦᱩᱫᱤᱥ ᱠᱮᱫᱟ ᱪᱮᱫ ᱤᱧ ᱧᱮᱞᱟ ᱵᱮᱥᱛᱮ? ᱠᱚᱭᱚᱜ ᱨᱟᱠᱟᱵ ᱠᱮᱫᱟᱭ ᱨᱩᱵᱤ ᱫᱟ ᱥᱮᱫ ᱟᱨ ᱧᱮᱞ ᱠᱮᱫᱮᱭᱟᱭ ᱪᱚᱴ ᱠᱷᱚᱱ ᱯᱷᱮᱰ ᱦᱟᱹᱵᱤᱡ᱾ ᱨᱩᱵᱤ ᱫᱚ ᱵᱚᱦᱚᱜ ᱨᱮᱭᱟᱜ ᱰᱷᱮᱨ ᱩᱵ ᱫᱚ ᱧᱩᱨ ᱟᱠᱟᱱ ᱛᱮ ᱛᱟᱞᱟ ᱵᱚᱦᱚᱜ ᱫᱚ ᱠᱷᱟᱹᱨᱟᱹᱭ ᱞᱮᱠᱟ ᱧᱮᱞᱚᱜ ᱠᱟᱱ ᱟᱨ ᱛᱤᱱᱟᱹᱜ ᱥᱟᱨᱮᱡ ᱢᱮᱱᱟᱜ ᱫᱚ ᱦᱮᱸᱫᱮ ᱟᱨ ᱯᱟᱺᱰᱩ ᱢᱮᱥᱟ᱾ ᱟᱨ ᱢᱮᱫ ᱟᱦᱟ ᱦᱚᱸ ᱞᱟᱦᱟ ᱠᱷᱚᱱ ᱰᱷᱮᱨ ᱯᱷᱮᱨᱟᱣᱹᱹᱹ ᱱᱚᱶᱟ ᱫᱚ ᱪᱮᱫ ᱨᱮᱭᱟᱜ ᱪᱤᱱᱦᱟᱹ? ᱨᱩᱵᱤ ᱫᱟᱼᱣᱟᱜ ᱫᱚ ᱱᱤᱛᱚᱜ ᱩᱢᱮᱨ ᱦᱩᱭᱩᱜ ᱠᱟᱱᱟ?
ᱟᱡ ᱥᱮᱫ ᱵᱮᱸᱜᱮᱫ ᱦᱟᱹᱯᱤ ᱠᱟᱫ ᱧᱮᱞ ᱛᱮ ᱨᱩᱵᱤ ᱫᱚᱭ ᱢᱮᱱ ᱠᱮᱫᱟ᱾ “ᱥᱟᱹᱨᱤ ᱜᱮ ᱜᱤᱱᱤ ᱦᱟᱲᱟᱢᱚᱜ ᱠᱟᱹᱱᱟᱹᱧ ᱟᱨ ᱯᱩᱥᱴᱟᱹᱣ ᱛᱮᱧ ᱫᱤᱥᱟᱹ ᱮᱫᱟ ᱟᱢ ᱫᱚ ᱱᱤᱛ ᱫᱚ ᱮᱠᱷᱮᱱ ᱜᱮᱞ ᱢᱚᱬᱮ ᱥᱮᱨᱢᱟ ᱮᱢ ᱞᱮᱵᱮᱫ ᱟᱠᱟᱫᱟ᱾” ᱥᱚᱦᱟᱜᱤᱱᱤᱭᱟᱜ ᱢᱮᱫ, ᱢᱮᱫ ᱫᱟᱜ ᱛᱮ ᱯᱮᱨᱮᱡ ᱮᱱᱟ, ᱫᱷᱟᱹᱨᱛᱤ ᱨᱮᱭᱟᱜ ᱱᱚᱠᱥᱟ ᱢᱮᱫ ᱠᱷᱚᱱ ᱫᱟᱱᱟᱝ ᱮᱱᱟ, ᱚᱱᱛᱚᱨ ᱨᱮᱭ ᱧᱮᱞ ᱠᱮᱫᱮᱭᱟ ᱰᱷᱮᱨ ᱫᱤᱱ ᱞᱟᱦᱟ ᱨᱮᱱ ᱨᱩᱵᱤ ᱫᱟ᱾
ᱵᱟᱹᱭᱼᱵᱟᱹᱭ ᱛᱮ ᱥᱚᱦᱟᱜᱤᱱᱤᱼᱭᱟᱜ ᱥᱤᱛᱩᱝ ᱪᱷᱩᱴᱤ ᱦᱚᱸ ᱯᱟᱨᱚᱢ ᱪᱟᱞᱟᱜ ᱠᱟᱱᱟ᱾ ᱟᱪᱠᱟ ᱜᱮ ᱢᱤᱫ ᱫᱤᱱ ᱠᱟᱹᱠᱤ ᱜᱳᱜᱳ ᱫᱚ ᱥᱚᱦᱟᱜᱤᱱᱤ ᱮ ᱢᱮᱛᱟᱫ ᱫᱮᱭᱟ᱾ “ᱦᱮᱸᱫᱟ ᱵᱤᱴᱤ, ᱠᱤᱪᱨᱤᱡ ᱠᱚ ᱥᱟᱯᱷᱟ ᱵᱟᱲᱟᱠᱟᱜ ᱟᱢ, ᱜᱟᱯᱟ ᱱᱷᱟᱜ ᱟᱢ ᱧᱮᱞ ᱞᱟᱹᱜᱤᱫ ᱯᱮᱲᱟ ᱠᱚ ᱦᱤᱡᱩᱜᱼᱟ᱾” ᱥᱚᱦᱟᱜᱤᱱᱤ ᱫᱚ ᱚᱲᱟᱜ ᱛᱮᱭ ᱵᱚᱞᱚ ᱮᱱᱟ ᱟᱨ ᱫᱤᱥᱟᱹ ᱦᱮᱡ ᱟᱫᱮᱭᱟ ᱨᱩᱵᱤ ᱫᱟ ᱟᱜ ᱠᱟᱛᱷᱟ᱾ ᱥᱟᱹᱨᱤ ᱜᱮᱹᱹᱹ ᱨᱩᱵᱤ ᱫᱟ ᱟᱜ ᱫᱩᱞᱟᱹᱲᱹᱹᱹ ᱟᱨ ᱢᱤᱫ ᱥᱮᱫ ᱟᱡ ᱵᱟᱵᱟᱼᱣᱟᱜ ᱫᱩᱞᱟᱹᱣ᱾ ᱨᱩᱵᱤ ᱥᱟᱶ ᱮ ᱵᱟᱯᱞᱟ ᱞᱮᱱᱠᱷᱟᱱ ᱟᱡ ᱵᱟᱵᱟ ᱵᱮ ᱦᱤᱥᱟᱹᱵᱽ ᱫᱩᱠ ᱮ ᱧᱟᱢᱟ ᱟᱨ ᱥᱟᱱᱟᱢ ᱢᱟᱹᱱ ᱢᱚᱨᱡᱟᱫᱟ ᱪᱟᱵᱟᱜ ᱛᱟᱭᱟ᱾ ᱵᱟᱝᱹᱹᱹ ᱵᱟᱝ ᱟᱡ ᱵᱟᱵᱟᱼᱣᱟᱜ ᱠᱟᱛᱷᱟ ᱛᱮᱜᱮᱭ ᱥᱮᱱᱚᱜᱼᱟ᱾ ᱠᱤᱪᱨᱤᱡ ᱠᱚ ᱥᱚᱵᱚᱫ ᱥᱟᱯᱷᱟ ᱵᱟᱲᱟ ᱠᱟᱛᱮ ᱟᱡ ᱦᱚᱸᱭ ᱰᱟᱹᱵᱽᱨᱟᱹ ᱥᱟᱯᱷᱟ ᱮᱱᱟᱭ᱾ ᱟᱡ ᱜᱚᱴᱟ ᱫᱤᱱ ᱵᱩᱜᱤ ᱛᱮᱭ ᱠᱟᱹᱢᱤ ᱵᱟᱲᱟ ᱠᱮᱫᱟ᱾ ᱚᱱᱟ ᱧᱮᱞ ᱛᱮ ᱟᱡ ᱵᱟᱵᱟ ᱫᱚ ᱟᱹᱰᱤ ᱟᱸᱴ ᱮ ᱠᱩᱥᱤ ᱮᱱᱟ᱾
ᱟᱹᱭᱩᱵ ᱵᱮᱲᱟ ᱥᱚᱦᱟᱜᱤᱱᱤ ᱫᱚ ᱠᱟᱸᱰᱟ ᱥᱟᱵ ᱠᱟᱛᱮ ᱩᱥᱟᱹᱨᱟ ᱛᱮᱭ ᱪᱟᱞᱟᱣ ᱮᱱᱟ ᱠᱩᱧ ᱫᱟᱜ ᱞᱩ᱾ ᱠᱩᱧ ᱴᱷᱮᱱ ᱠᱟᱸᱰᱟ ᱫᱚᱦᱚ ᱠᱟᱛᱮ ᱵᱟᱹᱞᱴᱤ ᱨᱮ ᱵᱟᱵᱮᱨ ᱛᱚᱛᱚᱞ ᱮ ᱫᱷᱩᱨᱟᱹᱣ ᱮᱱᱟ᱾ ᱪᱮᱠᱟ ᱪᱚᱭ ᱫᱤᱥᱟᱹ ᱜᱚᱫ ᱠᱮᱫᱟᱭ ᱟᱡ ᱠᱟᱹᱴᱤᱡ ᱮ ᱛᱟᱦᱮᱸ ᱠᱟᱱ ᱨᱮ ᱫᱤᱱᱟᱹᱢ ᱜᱮ ᱨᱩᱵᱤ ᱫᱟ ᱫᱟᱜ ᱮ ᱞᱩ ᱟᱭ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱫᱤᱥᱟᱹ ᱠᱮᱫᱟᱭ ᱟᱡ ᱵᱟᱵᱟᱭ ᱫᱩᱞᱟᱹᱲ ᱟᱫᱮ ᱠᱟᱱ ᱛᱟᱦᱮᱸ ᱨᱮᱦᱚᱸ ᱚᱠᱛᱮ ᱵᱮᱜᱚᱨ ᱛᱮ ᱢᱤᱫ ᱛᱟᱞᱟᱣ ᱫᱚ ᱵᱟᱭ ᱧᱮᱞ ᱫᱟᱲᱮᱭᱟᱭ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱠᱟᱹᱠᱤ ᱜᱳᱜᱳᱼᱣᱟᱜ ᱥᱟᱱᱛᱟᱣ᱾ ᱢᱮᱱᱠᱷᱟᱱ ᱨᱩᱵᱤ ᱫᱟ, ᱥᱚᱦᱟᱜᱤᱱᱤ ᱫᱚ ᱵᱟᱹᱞᱴᱤ ᱟᱲᱟᱜ ᱜᱤᱰᱤ ᱠᱟᱛᱮ ᱨᱟ~ᱨᱟᱜ ᱮ ᱫᱷᱩᱨᱟᱹᱣ ᱮᱱᱟ᱾
“ᱜᱤᱱᱤ ᱪᱮᱫᱟᱜ ᱮᱢ ᱨᱟᱜ ᱮᱫᱟ? ᱨᱩᱵᱤ ᱫᱟ ᱟᱜ ᱟᱲᱟᱝ ᱟᱸᱡᱚᱢ ᱛᱮ ᱟᱪᱠᱟ ᱜᱮ ᱨᱟᱜ ᱮ ᱥᱟᱹᱨᱫᱤ ᱠᱮᱫᱟ᱾ ᱨᱩᱵᱤ ᱫᱚ ᱵᱟᱹᱞᱴᱤ ᱥᱟᱵ ᱠᱟᱛᱮ ᱠᱟᱸᱰᱟ ᱫᱚᱭ ᱞᱩ ᱯᱮᱨᱮᱡ ᱠᱮᱫ ᱛᱟᱭᱟ, ᱚᱱᱟ ᱧᱮᱞ ᱛᱮ ᱥᱚᱦᱟᱜᱤᱱᱤ ᱮ ᱢᱮᱱ ᱠᱮᱫᱟ, ᱪᱮᱫᱟᱜ ᱮᱢ ᱯᱮᱨᱮᱡ ᱠᱮᱫᱟ ᱨᱩᱵᱤ ᱫᱟ; ᱦᱚᱲ ᱫᱚ ᱪᱮᱫ ᱠᱚ ᱦᱩᱫᱤᱥᱟ?”
“ᱡᱟᱦᱟᱸᱱᱟᱜ ᱜᱮᱠᱚ ᱦᱩᱫᱤᱥ ᱩᱱᱟᱹᱜ ᱫᱤᱱᱤᱧ ᱞᱩ ᱟᱢ ᱠᱟᱱ ᱛᱟᱦᱮᱸ ᱠᱟᱱᱟ, ᱛᱮᱦᱮᱧ ᱢᱤᱫ ᱫᱤᱱ ᱞᱩ ᱠᱟᱛᱮ ᱫᱚ ᱪᱤᱠᱟᱹᱜ?” ᱢᱮᱱᱠᱷᱟᱱ ᱟᱢ ᱫᱚ ᱪᱮᱫᱟᱜ ᱮᱢ ᱨᱟᱜ ᱮᱫᱟ ᱢᱟᱥᱮ ᱞᱟᱹᱭᱟᱹᱧ ᱢᱮ᱾”
ᱥᱚᱦᱟᱜᱤᱱᱤ ᱮ ᱢᱮᱱ ᱠᱮᱫᱟ, “ᱨᱩᱵᱤ ᱫᱟ ᱮᱠᱷᱮᱱ ᱠᱟᱸᱰᱟ ᱫᱚ ᱫᱟᱜ ᱛᱮ ᱵᱟᱢ ᱯᱮᱨᱮᱡ ᱮᱫ ᱛᱤᱧ ᱛᱟᱸᱦᱮᱱᱟ, ᱢᱮᱱᱠᱷᱟᱱ ᱱᱤᱛ ᱤᱧ ᱵᱩᱡᱷᱟᱹᱣ ᱮᱫᱟ ᱤᱧ ᱵᱮᱜᱚᱨ ᱵᱟᱰᱟᱭ ᱛᱮᱜᱮ ᱵᱟᱵᱟ ᱟᱨ ᱜᱳᱜᱳ ᱯᱷᱟᱨᱟᱠ ᱠᱤᱱ ᱛᱟᱦᱮᱸ ᱠᱟᱱ ᱨᱮᱦᱚᱸ ᱟᱢ ᱫᱚ ᱡᱟᱣ ᱜᱮ ᱤᱧ ᱥᱩᱨ ᱨᱮ ᱛᱟᱦᱮᱸ ᱠᱟᱛᱮ ᱟᱢᱟᱜ ᱫᱩᱞᱟᱹᱲ ᱛᱮ ᱤᱧᱟᱜ ᱠᱷᱟᱹᱞᱤ ᱚᱱᱛᱚᱨ ᱮᱢ ᱫᱩᱞ ᱯᱮᱨᱮᱡ ᱟᱠᱟᱫᱟ᱾ ᱡᱟᱣ ᱜᱮ ᱤᱧᱟᱜ ᱥᱩᱠ ᱫᱩᱠ ᱵᱟᱰᱟᱭ ᱞᱟᱹᱜᱤᱫ ᱛᱤᱱᱟᱹᱜ ᱫᱩᱞᱟᱹᱲ ᱟᱲᱟᱝ ᱛᱮᱢ ᱠᱩᱞᱤᱭᱤᱧ ᱛᱟᱦᱮᱸ ᱠᱟᱱᱟ ᱨᱩᱵᱤ ᱫᱟ ᱫᱩᱞᱟᱹᱲ ᱨᱮᱭᱟᱜ ᱩᱢᱮᱨ ᱫᱚ ᱵᱟᱹᱱᱩᱜᱼᱟ᱾ ᱱᱤᱛ ᱱᱚᱶᱟ ᱫᱟᱜ ᱞᱩ ᱜᱷᱟᱴ ᱨᱮ ᱠᱩᱧ ᱥᱟᱹᱠᱷᱤ ᱫᱚᱦᱚ ᱠᱟᱛᱮᱧ ᱢᱮᱛᱟᱢ ᱠᱟᱱᱟ᱾ ᱥᱩᱠ ᱫᱩᱠ ᱨᱮ ᱡᱟᱣ ᱜᱮ ᱤᱧ ᱫᱚ ᱟᱢ ᱨᱮᱱ ᱜᱮᱧ ᱛᱟᱦᱮᱸᱱᱟ᱾”
“ᱦᱮᱸᱫᱟ, ᱥᱟᱺᱡᱽᱞᱤ, ᱥᱚᱦᱟᱜᱤᱱᱤ ᱫᱚ ᱪᱮᱠᱟᱛᱮ ᱩᱱᱤ ᱦᱟᱲᱟᱢ ᱫᱚᱭ ᱠᱩᱥᱤᱭᱟᱭ ᱠᱟᱱᱟ?” ᱚᱱᱟᱜᱮᱧ ᱦᱩᱫᱤᱥ ᱮᱫᱟ᱾ ᱱᱚᱶᱟ ᱠᱟᱛᱷᱟ ᱢᱮᱛᱟᱫ ᱮ ᱛᱟᱦᱮᱸ ᱠᱟᱱ ᱨᱮᱭ ᱢᱮᱛᱟᱫ ᱫᱤᱧᱟ “ᱟᱯᱮ ᱫᱚ ᱫᱩᱞᱟᱹᱲ ᱵᱟᱯᱮ ᱵᱟᱰᱟᱭᱟ᱾ ᱚᱱᱟᱛᱮ ᱥᱚᱢᱟᱡᱽ ᱨᱮᱱ ᱟᱨ ᱟᱯᱮ ᱟᱲᱮ ᱯᱟᱥᱮ ᱨᱮᱱ ᱫᱩᱞᱟᱹᱲ ᱫᱚ ᱪᱮᱫᱽ ᱯᱮ᱾” ᱥᱟᱹᱨᱤ ᱜᱮ ᱟᱹᱰᱤ ᱦᱟᱦᱟᱲᱟ᱾
No comments:
Post a Comment