एन हिलोक् बेला जाँहान का़मी बाङ ताहें कान ते नाम तेको सेद् दाणा बाड़ा इञ सेन लेना। सेन कातेञ ञेल केदेया नामारेन साँ़जली बिटी पुतूल दो मिद्टा़ङ चिठी साब् कातेय दुड़ूब् हा़पी आकानाय। कुली गोद् केदेया़ञ चेद् चिठी काना साँ़जली? चेदाक् एम दुड़ूब् थिर एना? मेताद् दि़ञाय, हें सा़री गे दुड़ूब् थिर आकाना़ञ सोहागिनीयाक् नोवा चिठी पाड़हाव काते। कुली केदेया़ञ ओकोय कानाय सोहागिनी दो, चेद् ए ओल आकावाद् मेया?
सोहागिनी तेले दो मिद् ते उसाग्राम गर्ल्स हॉस्टेल रेले ताहें काना। ओल आकावा़दिञाय जे, मोन ओनतोर रे मिद्टा़ङ जायगा ठिक काते उसा़राञ बाडाय होचोय। भाड़ा ओड़ाक् जा़निज् इञ ठिक दाड़ेयाक् खान रूबी दा तिकिन हेज् काते किन ताँहेना। ओकाय कानाय रूबी दा दो?
सा़री गे ओना गेञ हुदिस एदा इञ हों। रूबी दा आर सोहागिनी-याक् दुला़ड़ रेयाक् जोड़ाव दो आ़डि हाहाड़ा। तेहेञ उनकिन ला़गिद् चेद् इञ चिका़ दाड़ेयाक्-आ? हॉस्टेल रे ताहें कान रे सोहागिनी जाव गे जोतो काथाय ला़या़ञ कान ताहें काना, सोहागिनी दो आज् बाबा पारगाना रेन साधेर होपोन एरा, आ़डि का़टिज् उमेर रेगे आज् गोगो दोय टुवा़र होटो आकादेया। पारगाना दो घारोंज चालाव मुसकिल ए बुझा़व केद् ते दोसार धाव आरहों एराय ञाम आना। सोहागिनी दो का़की गोगो तिरेय पाड़ावेना। का़की गोगो दो सोहागिनी गे दाक् लु था़री गासाव एमान जोतोय का़मी होचोया। मिद् दिन का़की गोगो दो सोहागिनी दाक् लु ए कुल लेदेया। ओना लाहा रे इंदरा़ कुञ खोन दाक् दो सोहागिनी तिस हों बाय लु बाड़ायेद् ताहें काना। मिद् टेन होपोन का़ँडुम एनते कुञ ठेन ए सेनेना, मेनखान कुञ खोन दाक् बाय राकाब् दाड़ेयाक् कान ते ओंडे के तिंगु काते कुसुद्-कुसुद् रा-राक् ए एहोब् एना। उन ओक्तो उनकु रेन गुती कोड़ा रूबी दो ओनतेय सेन पारोमोक् कान ताहें काना। कुली केदेयाय चेदाक् एम राक् एदा? सोहागिनी दो राक् तुलूज् ए रोड़ रूवा़ड़ केदा – दाक् बा़ञ राकाब् दाड़ेयाक् काना रूबी दा।
गुति कोड़ा रूबी-ए मेन केदा – ‘‘आलोम रागा देन इञीञ लु आमा। आर आम गोगो दाक् लुय कुल काम खान इञ होहोवा़ञ मे, इञीञ लु राकाब् आमा।’’ उन हिलोक् खोन जाव गे रूबी दो सोहागिनी-याक् काँडा रे दाक् ए लु पेरेजा आर सोहागिनी दोय इदिया। आर रूबी दो आ़डि दुला़ड़ आड़ाङ ते सोहागिनी साँव तेय गालमारावा। नोतेय बाडाय कान ताहें काना उनि गिदरा़ सोंगे मोज बेभार लेकान कोदो घारोंज रे ओकोय हों बाको ताहें काना। मिद् बोछोर तायोम तेगे का़की गोगो रेन मिद्टा़ङ कोड़ा गिदरा़य हुय एना। सोहागिनी-याक् का़मी दो आ़डि आँट बा़ड़ती इदियेना। आ़तु स्कूल रेय पाड़हावक् कान ताहें काना; मेनखान ञेल एना का़मी कोरेनाक् भीड़ इया़ ते दिना़म हिलोक् स्कूल दो बाय चालाव दाड़ेयाक्-आ। बोछोर रेयाक् मुचा़द् बिनिड रे सोहागिनी दो बाय पास दाड़ेयाद्-आ, ठाकेद् ताहें एनाय।
सोहागिनी आज् बाबा दो नोवा ञेल काते आ़डि हुदिस रेय पाड़ावेना। चिका़ ते सोहागिनी दोय ठाकेद् ताहें एना? मिद् दिन रूबी दो पारगाना ए मेताद् एया ‘‘सोहागिनी दो मिद्टा़ङ बोर्डिंग (हॉस्टेल) तानाक् रे भुरती काय मे। ओड़ाक् रेदो का़मी को रेयाक् भीड़ ते बाय पाड़हाव दाड़ेयाक् काना।’’ आर सोहागिनी आपात दो उसाग्राम गर्ल्स हॉस्टेल ते इदि ए ला़गिद् ए गोटा केदा। नोवा काथा बाडाय काते एँगात दोय मेन केदा, ‘‘बोहोक् रेदो बा़नुक् ताया, खोरोज बा़ड फाराक ते इदि काते दो चेद् हुयूक्-आ। कुड़ी गिदरा़ पाड़हाव काते बाङ चेद् एम चिका़य?’’ मेनखान सोहागिनी आपात दोय बाडाया, कुड़ी गिदरा़ ओलोक् पाड़हाव चेद् ओचो को रेयाक् ढेर जा़रूड़ मेनाक्-आ। एनते, उनकु कान गेको तायोम दाराम मोज घारोंज बेनाव राकाब् कोदो। आर सोहागिनी दो उसाग्राम गर्ल्स हॉस्टेल तेय इदि होटो कादेया।
सोहागिनी दो हाराक् कान तुलूज् ओलोक् पाड़हावक् हों चे जोङ ए एहोब् केदा। टाका पुयसा़ इदि होटो काक् ला़गिद् आर हिरी बाड़ाय ला़गिद् पारगाना दो रूबी गेय कोल आया। छुटी कोरे हों रूबी गेय इदि-आ़गु एया। ओनाते सोहागिनी हों आको रेन गुति रूबी गे आजाक् जा़रूड़ोक् कोदो सानाम ए ला़य आया।
मिद् दोम सितुङ छुटी रे हॉस्टेल खोन हिजुक् ओक्तो होर रे सोहागिनी दो रूबी ए कुली केदेया, ‘‘आछा रूबी दा, आले ठेन आ़डि आयमा दिनेम का़मी केदा आर बा़द् कोहोंम किरिञ बाड़ा केदा। चेदाक् आदो बाम बापलाक् काना?’’ रूबी दो नोवा काथा ते कोड़ाम रे सोबोक् केदे लेकाय बुझा़व केदा आरे तुँबुद् हा़पियेना आर ओनतोर रेनाक् दुक झारना दो मेद् खोन बोहेल ओडोक एना। ओना ञेल ते सोहागिनी दोय हाहाड़ा एना आर ए बोतोर एना, ‘‘रूबी दा आछा राक् एद् कानाय? कुली एया से बाङ?’’ सोहागिनी बाय जिवी लेदा, कुली केदेयाय, ‘‘रूबी दा चेदाक् एम राक् एदा?’’ रूबी दा जाहाँ लेकाते मेद् दाक् साँबड़ाव कातेय मेन केदा, ‘‘आम…’’ आरे थिर एना।
‘‘इञ… इञ दो चेद् रूबी दा?’’
रूबी रोड़ ए एहोब् एना, आम दो पासेन बाम दिसा़या गिनी, आम बाबा तिन रे दोसार धाव बापला काते आम गोगोय आ़गु केदेया, ओना तायोम खोन बापला काते आम गोगोय आ़गु केदेया, ओना तायोम खोन जाव गे दाक् इञ लु आम कान ताहें काना आर आमाक् दुक ञेल ते इञ गे मोने रे दुक इञ आटकारेद् ताहें काना। आम बाबा दो आ़डि आँट ए दुला़ड़ मे इना़ ते आम जेमोन बेस तेम हाराक् आर गोगोवाक् दुला़ड़-एम ञाम, ओना इया़ तेगे दोसार आम गोगोय आ़गु लेदेया। आम बाबावाक् साना बाङ पुरा़व लेना, आर आम बाबा जाव गे का़मी को रेयाक् झामेला रे ताँहेन इना़ ते आम ठेन दो इञ गेय कुल इञा। ओना कारोन ते आम गोगोवाक् आ़डि लेकान बा़ड़िज् रोड़ साहाव हुय आकादिञा। सा़री गे गिनी इञ दो आपे रेन गुती; मेनखान तेहेञ दो नोवा धा़रती रे एखेन आम गेञ दुला़ड़ आकाद् मेया… इञाक् जिवी रे सुक दुक रेन गोड़ोयिज् मेनते। एखेन मिद् धाव इञ सेद् बेस ते कोयोग मे गिनी आर ञेलिञ मे, आदोम बुझा़वा आम ला़गिद् इञ दो तिना़क् दिन खोन ता़ँगी रे मिना़ञा।
सोहागिनी दो मोने रेय हुदिस केदा चेद् इञ ञेला बेस ते? कोयोक् राकाब् केदाय रूबी दा सेद् आर ञेल केदेयाय चोट खोन फेट हा़बिज्। रूबी दो बोहोक् रेयाक् ढेर उब् दो ञुर आकान ते ताला बोहोक् दो खा़रा़य लेका ञेलोक् कान आर तिना़क् सारेज् मेनाक् दो हेंदे आर पा़ँडु मेसा आर मेद् आहा हों लाहा खोन ढेर फेराव… नोवा दो चेद् रेयाक् चिनहा़? रूबी दा-वाक् दो नितोक् उमेर हुयुक् काना?
आज् सेद् बेंगेद् हा़पी काद् ञेल ते रूबी दोय मेन केदा। ‘‘सा़री गे गिनी हाड़ामोक् का़ना़ञ आर पुसटा़व तेञ दिसा़ एदा आम दो नित दो एखेन गेल मोणे सेरमा एम लेबेद् आकादा।’’ सोहागिनीयाक् मेद्, मेद् दाक् ते पेरेज् एना, धा़रती रेयाक् नोकसा मेद् खोन दानाङ एना, ओनतोर रेय ञेल केदेया ढेर दिन लाहा रेन रूबी दा।
बा़य-बा़य ते सोहागिनीयाक् सितुङ छुटी हों पारोम चालाक् काना। आचका गे मिद् दिन का़की गोगो दो सोहागिनी ए मेताद् देया। ‘‘हेंदा बिटी, किचरिज् को साफा बाड़ा काक् आम, गापा न्हाक् आम ञेल ला़गिद् पेड़ा को हिजुक्-आ।’’ सोहागिनी दो ओड़ाक् तेय बोलो एना आर दिसा़ हेज् आदेया रूबी दा आक् काथा। सा़री गे… रूबी दा हाक् दुला़ड़… आर मिद् सेद् आज् बाबा-वाक् दुला़ड़। रूबी साँव ए बापला लेनखान आज् बाबा बे हिसा़ब दुक ए ञामा आर सानाम मा़न मोरयादा चाबाक् ताया। बाङ… बाङ आज् बाबावाक् काथा तेगेय सेनोक्-आ। किचरिज् को सोबोद् साफा बाड़ा काते आज् होंय डा़बरा़ साफा एनाय। आज् गोटा दिन बुगी तेय का़मी बाड़ा केदा। ओना ञेल ते आज् बाबा दो आ़डि आँट ए कुसी एना।
आ़युब् बेड़ा सोहागिनी दो काँडा साब् काते उसा़रा तेय चालाव एना कुञ दाक् लु। कुञ ठेन काँडा दोहो काते बा़लटी रे बाबेर तोतोल ए धुरा़व एना। चेका चोय दिसा़ गोद् केदाय आज् का़टिज् ए ताहें कान रे दिना़म गे रूबी दा दाक् ए लु आय कान ताहें काना। दिसा़ केदाय आज् बाबाय दुला़ड़ आदे कान ताहें रेहों ओक्ते बेगोर ते मिद् तालाव दो बाय ञेल दाड़ेयाय कान ताहें काना आर का़की गोगोवाक् सानताव। मेनखान रूबी दा, सोहागिनी दो बालटी आड़ाक् गिडी काते रा-राक् ए धुरा़व एना।
गिनी चेदाक् एम राक् एदा? रूबी दा आक् आड़ाङ आँजोम ते आचका गे राक् ए सा़रदी केदा। रूबी दो बालटी साब् काते काँडा दोय लु पेरेज् केद् ताया, ओना ञेल ते सोहागिनी ए मेन केदा, चेदाक् एम पेरेज् केदा रूबी दा; होड़ दो चेद् को हुदिसा?’’
‘‘जाँहानाक् गेको हुदिस उना़क् दिनिञ लु आम कान ताहें काना, तेहेञ मिद् दिन लु काते चिका़क्?’’ मेनखान आम दो चेदाक् एम राक् एदा मासे ला़या़ञ मे।’’
सोहागिनी ए मेन केदा, ‘‘रूबी दा एखेन काँडा दो दाक् ते बाम पेरेज् एद् तिन ताँहेना, मेनखान नित इञ बुझा़व एदा इञ बेगोर बाडाय तेगे बाबा आर गोगो फाराक किन ताहें कान रेहों आम दो जाव गे इञ सुर रे ताहें काते आमाक् दुला़ड़ ते इञाक् खा़ली ओनतोर एम दुल पेरेज् आकादा। जाव गे इञाक् सुक दुक बाडाय ला़गिद् तिना़क् दुला़ड़ आड़ाङ तेम कुलीयिञ ताहें काना रूबी दा, दुला़ड़ रेयाक् उमेर दो बा़नुक्-आ। नित नोवा दाक् लु घाट रे कुञ सा़खी दोहो कातेञ मेताम काना। सुक दुक रे जाव गे इञ दो आम रेन गेञ ताँहेना।’’
‘‘हेंदा, सा़ँजली, सोहागिनी दो चेकाते उनि हाड़ाम दोय कुसीयाय काना?’’ ओनागेञ हुदिस एदा। नोवा काथा मेताद् ए ताहें कान रेय मेताद् दिञा ‘‘आपे दो दुला़ड़ बापे बाडाया। ओनाते सोमाज रेन आर आपे आड़े पासे रेन दुला़ड़ चेद पे।’’ सा़री गे आ़डि हाहाड़ा।
